Airport Information

ဂျပန်နိုင်ငံ၏ လေကြောင်းလိုင်းတစ်ခုဖြစ်သည့် All Nippon Airways (ANA) က ကိုဗစ်ကပ်ရောဂါကြောင့် မိတ်ဆက်မှု နှောင့်နှေးခဲ့ရသည့် တိုကျို- ဥရောပ ခရီးစဉ် လမ်းကြောင်းများကို လာမည့် ၂၀၂၅ ခုနှစ်မှ စတင်၍ ဖြည်းဖြည်းချင်း လွှင့်တင်သွားမည် ဖြစ်ကြောင်း ပြောသည်။ အဆိုပါ တိုကျို- ဥရောပ လမ်းကြောင်းသစ်များ ချဲ့ထွင်နေချိန်တွင် အာရှခရီးစဉ် အချို့ကို ဆိုင်းငံ့ထားမည် ဖြစ်ပြီး တိုကျို- ဥရောပ ခရီးစဉ်များ ချဲ့ထွင်ကာ လေယာဉ်လက်မှတ် ဈေးနှုန်းများကို မြှင့်တင်ခြင်းဖြင့် နိုင်ငံတကာ ခရီးသွားများထံမှ ၎င်း၏ ၀င်ငွေကို တိုးလာစေရန် စီစဉ်ထားကြောင်း သိရသည်။ မြို့လယ်နှင့် ဝေးသော်လည်း တိုကျိုဧရိယာကို အဓိက ဝန်ဆောင်မှုပေးလျက် ရှိသည့် အကြီးဆုံးလေဆိပ်ဖြစ်သော နာရီတာလေဆိပ် ( Narita Airport ) မှ လမ်းကြောင်းများသည် ရန်ကုန်၊ ချန်နိုင်းနှင့် ဖနွမ်းပင်တို့ကဲ့သို့ အာရှဒေသ ခရီးစဉ်များကိုမူ ၂၀၂၅ ဘဏ္ဍာနှစ်အတွင်း ရပ်ဆိုင်းထားမည် ဖြစ်သည်။ “ ကျွန်တော်တို့ အစက စီစဉ်ထားတဲ့အတိုင်း ဟာနဲဒါလေဆိပ်ရဲ့ လေကြောင်းလိုင်း ခရီးစဉ်သစ်တွေကို လာမယ့် ၂၀၂၅ ခုနှစ် ဘဏ္ဍာရေးနှစ်အတွင်းမှာ စတင် လုပ်ဆောင်သွားချင်ပါတယ်" ဟု အဖွဲ့၏ ဘဏ္ဍာရေး အရာရှိချုပ် Kimihiro Nakahori က Nikkei Asia Media နှင့် အင်တာဗျူးတွင် ပြောသည်။ ANA အနေဖြင့် ၂၀၂၀ ခုနှစ်တွင် တိုကျိုမြို့လယ် အနီးအနားရှိ ဟာနဲဒါလေဆိပ်၌ မီလန်နှင့် အစ္စတန်ဘူလ်သို့ လမ်းကြောင်းသစ်များ လုပ်ဆောင်ရန် စီစဉ်ထားခဲ့ပြီး လေဆိပ်အတွင်း နိုင်ငံတကာ ဆိုက်ရောက်ရာနှင့် ထွက်ခွာရာ နေရာများ တိုးလာနေသည့် အကြောင်းကိုလည်း ထည့်သွင်း ပြောကြားခဲ့သည်။ Advertisement Click Here >SB Plastic ၎င်းလေကြောင်းလိုင်းသည် ၂၀၂၅ ခုနှစ် ဘဏ္ဍာနှစ်တွင် လုပ်ငန်းလည်ပတ်မှု စုစုပေါင်းဝင်ငွေ ယန်း (၂.၃၂) ထရီလီယံ ( ဒေါ်လာ ၁၇.၄ ဘီလီယံ ) ထိ မြင့်တက်လာစေရန် စီစဉ်ထားသည်ဟု ပြီးခဲ့သည့် ဖေဖော်ဝါရီလက ကြေညာခဲ့ပြီး ကုမ္ပဏီ၏ ဝင်ငွေသည် ၂၀၁၉ ခုနှစ် ဘဏ္ဍာနှစ်ထက် (၁၈) ရာခိုင်နှုန်း တိုးလာစေရန် ရည်ရွယ်ခြင်း ဖြစ်သည်။ အထူးသဖြင့် အဓိက လေကြောင်းလိုင်း လည်ပတ်မှုများအနက် ANA အမှတ်တံဆိပ်အောက်ရှိ နိုင်ငံတကာ လေကြောင်းပျံသန်းမှုများထဲမှ ဝင်ငွေ ယန်း ၇၈၃ ဘီလံယံ တိုးလာစေရန် မျှော်မှန်းထားပြီး ရာခိုင်နှုန်းအားဖြင့် (၂၈) ရာခိုင်နှုန်းထိ မြင့်တက်လာစေရန် ရည်ရွယ်ထားကြောင်း သိရသည်။ သို့ရာတွင် Boeing 777 ပျံသန်း ပြေးဆွဲမှုကို နားလိုက်ခြင်းကြောင့် ထိုင်ခုံအရေအတွက်နှင့် ပျံသန်းမှုအကွာအဝေး စသည်တို့အပေါ် မူတည်ပြီး ANA နိုင်ငံတကာလေကြောင်း ခရီးစဉ်များတွင် တူညီသော အချိန်ကာလအတွင်း ဝင်ငွေရာခိုင်နှုန်း အနည်းငယ် ကျဆင်းနိုင်ကြောင်း ခန့်မှန်းထားသည်ဟု ဆိုသည်။ စီးပွားရေးအတွက် ခရီးသွားများ မကြာခဏ အသုံးပြုလေ့ရှိသည့် ဟာနဲဒါအခြေစိုက် ဥရောပ လမ်းကြောင်းများသို့ ပျံသန်းမှုများစွာကို ပြောင်းလဲ လုပ်ဆောင်ခြင်းဖြင့် ANA သည် ၎င်း၏ ယူနစ်စျေးနှုန်းကို ထိုင်ခုံတစ်ခုစီအတွက် မြှင့်တင်နိုင်ပြီး မြင့်မားသော လောင်စာဆီဈေးနှုန်းနှင့် အလုပ်သမားစရိတ်များကို ကာမိနိုင်စေရန် ကူညီပေးနိုင်မည် ဖြစ်သည်။ ကုမ္ပဏီ၏ အစီအစဉ်သည် ယူကရိန်းစစ်ပွဲကြောင့် လက်ရှိတွင် ဖြစ်မြောက် အောင်မြင်နိုင်မည် မဟုတ်သည့်အတွက် ၂၀၂၅ ဘဏ္ဍာနှစ်မှ ပြန်လည် စတင်မည့် ရုရှားနိုင်ငံသို့ လေကြောင်းပျံသန်းမှုများအတွက် ကြိုတင် စီစဉ်ထားခြင်း ဖြစ်သည်။ သို့သော် ပဋိပက္ခများ ဆက်လက် ဖြစ်ပေါ်နေသဖြင့် ရလဒ်မှာ ရှင်းရှင်းလင်းလင်း မသိရသေးပေ။ “ လက်ရှိ အခြေအနေက ရေရှည်ဖြစ်လာရင်တော့ ဖြေရှင်းဖို့ တစ်ခုခု စဉ်းစားရလိမ့်မယ် ” ဟု Nakahori က ဆိုသည်။ Su Mon Oo Source : Nikkie

မလေးရှားနိုင်ငံက တောင်ကိုရီးယားမှ ရင်းဂစ် (၄.၈) ဘီလီယံ၊ ဒေါ်လာသန်း (၉၁၀) ကျော် တန်ဖိုးရှိ FA-50 တိုက်လေယာဉ် (၁၈) စီးကို ဝယ်ယူလိုက်ကြောင်း Korean Aerospace Industries က ပြီးခဲ့သည့် ဖေဖော်ဝါရီလကုန်က အတည်ပြု ပြောကြားခဲ့သည်။ ၎င်းအနေဖြင့် အိန္ဒိယအခြေစိုက် Tejas နှင့် Pakistan-China GS17 ကို ကျော်ဖြတ်ပြီး တောင်ကိုရီးယားမှ ယခုကဲ့သို့ တိုက်လေယာဉ်များ ဝယ်ယူလိုက်ခြင်း ဖြစ်ကာ ၂၀၂၂ ခုနှစ် ဧပြီလတွင် Korean Aerospace Industries နှင့် လက်မှတ် ရေးထိုးခဲ့ကြခြင်း ဖြစ်သည်။ FA-50 သည် နိုင်ငံ၏ လေတပ်တွင် ၂၀၁၃ ခုနှစ်ကတည်းက Korea Aerospace Industries မှ ဖြန့်ကျက်ချထားခဲ့သော အပေါ့စား တိုက်ခိုက်ရေးလေယာဉ်တစ်စင်း ဖြစ်သည်။ တိုက်လေယာဉ်တွင် နည်းဗျူဟာ အချက်အလက်ချိတ်ဆက်မှု၊ တိကျသော လက်နက်များနှင့် မိမိကိုယ်ကိုယ် ကာကွယ်မှုစနစ်ခွဲများ ပါရှိပြီး NATO စနစ်များတွင် အလွယ်တကူ ပေါင်းစပ်နိုင်သည်။ မလေးရှားသည် ၎င်း၏ FA-50 အကြောင်းကို အသေးစိတ် မဖော်ပြထားသော်လည်း သဘောတူညီချက်အရ FA-50 တစ်စီး၏ စျေးနှုန်းသည် ဒေါ်လာ သန်း (၅၀) ခန့်ရှိပြီး အမေရိကန်၊ ယူကေ၊ ပြင်သစ်နှင့် ဂျာမနီနိုင်ငံများမှ တိုက်လေယာဉ်များနှင့် နှိုင်းယှဉ်လျှင် ဈေးထက်ဝက်ခန့် လျော့နည်းသည်ဟု သိရသည်။ မလေးရှားသည် ပြည်တွင်းအသားတင်ထုတ်ကုန်အပေါ် အခြေခံ၍ အရှေ့တောင်အာရှနိုင်ငံများ အသင်းအဖွဲ့ဝင်များကြားတွင် လက်နက်အသုံးစရိတ် အနည်းဆုံး နိုင်ငံတစ်နိုင်ငံအဖြစ် ဆက်လက် တည်ရှိနေသော်လည်း ၎င်းသည် ယခုအခါ Korean Aerospace Industries ၏ အကြီးမားဆုံး ဖောက်သည်ဖြစ်လာကာ ၂၀၁၇ ခုနှစ်မှ ၂၀၂၁ ခုနှစ်အတွင်း စစ်ဘက်ဆိုင်ရာ ပစ္စည်းများကို ကန်ဒေါ်လာ (၂) ဘီလီယံနီးပါးထိ ဝယ်ယူနေခဲ့ကြောင်း စတော့ဟုမ်း နိုင်ငံတကာ ငြိမ်းချမ်းရေး သုတေသနဌာန ( Stockholm International Peace Research Institute ) မှ အစီရင်ခံစာ ဖော်ပြထားသည်။ ၂၀၁၅ ခုနှစ်မှ စတင်ပြီး တောင်ကိုရီးယားနိုင်ငံသည် ကမ္ဘာ့အကြီးဆုံး တိုက်လေယာဉ်အပါအဝင် စစ်ဘက်ဆိုင်ရာ ပစ္စည်းများ ရောင်းဝယ်သည့် နိုင်ငံတစ်နိုင်ငံ ဖြစ်လာကာ လွန်ခဲ့သည့် (၅) နှစ်အတွင်း မလေးရှားနိုင်ငံ၏ စစ်ဘက်ဆိုင်ရာ ပစ္စည်းများ ဝယ်ယူမှုတွင် ထိပ်ဆုံး၌ တည်ရှိနေခဲ့ကြောင်း မလေးရှားတက္ကသိုလ်မှ စီနီယာကထိက Hoo Chiew-Ping က ဆိုသည်။ Advertisement Click Here >Lucky Bag & Swallow Plastic အရှေ့တောင်အာရှတွင် စစ်အသုံးစရိတ် သုံးစွဲမှု တက်လာသည်နှင့်အမျှ တောင်ကိုရီးယားသည်လည်း စစ်လက်နက် ရောင်းဝယ်မှုတွင် အကြီးဆုံး ဖြစ်လာခဲ့ပြီး ၎င်းထံမှ မလေးရှားအပါအဝင် အာဆီယံနိုင်ငံများ၊ ဗြိတိန်နိုင်ငံများ၊ အိန္ဒိယနိုင်ငံနှင့် တူရကီနိုင်ငံများမှ စစ်ဘက်ဆိုင်ရာ ပစ္စည်းများကို ဝယ်ယူလျက် ရှိသည်။ အင်ဒိုနီးရှားနှင့် တောင်ကိုရီးယားသည် အရှေ့တောင်အာရှတွင် ပထမဆုံးသော ကာကွယ်ရေးဆိုင်ရာ စက်မှုလုပ်ငန်း ပူးပေါင်းဆောင်ရွက်မှုကို သဘောတူ လက်မှတ်ရေးထိုးခဲ့ပြီး ယခု မလေးရှားအပါအဝင် ထိုင်းနှင့် ဖိလစ်ပိုင်တို့ကလည်း အလားတူ ပူးပေါင်း ဆောင်ရွက်မှုများ လုပ်ဆောင်နိုင်ရန် တာစူနေကြသည်။ ပိုလန်နိုင်ငံမှလည်း တောင်ကိုရီးယားမှ ဂျက်တိုက်လေယာဉ်များ၊ တင့်ကားများနှင့် တခြား စစ်ဘက်ဆိုင်ရာ ပစ္စည်းအမြောက်အမြားကို မှာယူထားသည်ဟု Hoo Chiew-Ping က မှတ်ချက်ပြုခဲ့သည်။ လက်ရှိတွင် K2 တင့်ကား အစီးရေ ၁,၀၀၀ နီးပါး မှာယူထားပြီး တောင်ကိုရီးယားတွင် ၁၈၀ ပြုလုပ်ကာ ကျန် ၈၀၀ ကို ပိုလန်တွင် တပ်ဆင် ပြုလုပ်ရန် တောင်းဆိုထားကြောင်း သိရသည်။ "တောင်ကိုရီးယားဟာ ကာကွယ်ရေးပစ္စည်း တင်သွင်းသူအနေနဲ့ အင်အားကြီးမားလာနေပြီး Korean Aerospace Industries အရှိန်အဟုန်နဲ့ တိုးတက်လာနေပါတယ်" ဟု မလေးရှားနိုင်ငံ၊ မဟာဗျူဟာနှင့် နိုင်ငံတကာလေ့လာရေး ပညာရှင် Thomas Daniel က ပြောသည်။ "ဒါဟာ နေ့ချင်းညချင်း ကိစ္စတော့ မဟုတ်ပါဘူး။ ဆယ်စုနှစ်ပေါင်းများစွာ ကြာခဲ့ပေမယ့် တောင်ကိုရီးယားမှာ ကြီးမားတဲ့ လက်နက်ကိုင်တပ်ဖွဲ့ရှိပြီး နည်းပညာပိုင်းအရ ရန်လိုတဲ့ အိမ်နီးချင်းနိုင်ငံလည်း ရှိတာကြောင့် ကာကွယ်ရေးမှာ အများကြီး သုံးစွဲတယ်ဆိုတာ မှတ်သားထားဖို့ လိုပါတယ်။ " ဟု ၎င်းက ဆက်ပြောသည်။ ယခင်ဝန်ကြီးချုပ်ဟောင်း Ismail Sabri လက်ထက်တွင် စီးပွားရေးကုန်သွယ်မှုကို ဦးစားပေးပြီး ထိုအချိန်က မလေးရှားအစိုးရသည် အိန္ဒိယ၏ Tejas ဂျက်တိုက်လေယာဉ်များ ဝယ်ယူရန်အတွက် စားအုန်းဆီ ကုန်ပစ္စည်းများကို အသုံးပြုကာ လဲလှယ် ရောင်းဝယ်ရေးစနစ်ကို အသုံးပြုခဲ့သည်ဟု ဆိုသည်။ မလေးရှား၏ ကာကွယ်ရေးမူဝါဒသည် နိုင်ငံ၏ ကိုယ်ပိုင် လက်နက်ကိုင်တပ်ဖွဲ့များကို လုံလောက်စွာ မထောက်ပံ့ပေးနိုင်ခြင်းနှင့် ၎င်း၏ ကာကွယ်ရေးဘက်ဂျက် ခွဲဝေချထားမှုသည် နည်းပါသဖြင့် ပြီးခဲ့သော နှစ်များအတွင်း ပြည်တွင်းနိုင်ငံရေးတွင် စိန်ခေါ်ခံခဲ့ရကြောင်း၊ အာဆီယံ၏ သုံးစွဲမှုအချိုးများထဲတွင် မလေးရှားနိုင်ငံသည် နောက်ဆုံးတွင် ရှိနေခဲ့ကြောင်း Hoo Chiew-Ping ၏ ပြောကြားချက်အရ သိရှိရသည်။ Su Mon Oo Ref : Nikkei Asia